आफ्ना आसेपासे र चाटुकारहरूसहितको सय बढीको दलबल लिए भारत भ्रमणमा निस्केका कठपुतली प्रधानमन्त्री नेपालले नेपालका नदीनालालगायत प्राकृतिक सम्पदाहरू भारतका पाउँमा सुम्पने वातावरण बनाउने प्रायः निश्चित छ ।
उसो त सदियौंदेखि नेपालका नदीनालामा आँखा गाड्दै आएको भारतले नेपालको वर्तमान कठपुतली सरकारबाट अनुचित फाइदा उठाउँदै नेपालको अमूल्य सम्पत्ति जलस्रोत आफ्नो पोल्टामा पार्न षड्यन्त्र गर्दै गरेको स्पष्ट देखिएको छ । आजभन्दा करिब १३ वर्ष पहिले एमालेको सरकारले बेचेको महाकाली नदी पनि अहिले पुनः एमालेकै नेतृत्वको असंवैधानिक एवं कठपुतली सरकारले भारतलाई लाहा छाप ठोकेर सुम्पदै छ । उता एकीकृत नेकपा (माओवादी)ले भने एमाले नेतृत्वको असंवैधानिक सरकारलाई राष्ट्र हित विपरीत दूरगामी प्रभाव पार्ने कुनै प्रकारका सन्धिसम्झौता एवं सहमति गर्ने अधिकार नभएको बताएको छ । तर कठपुतली सरकारका प्रधानमन्त्री माधव नेपाल भने पञ्चेश्वर योजनासम्बन्धी महाकाली सन्धिमा जसरी पनि हस्ताक्षर गर्ने धृष्टता व्यक्त गरिरहेका छन् । पानीको बाँडफाँड नमिलेर १३ वर्षसम्म डीपीआर (डिटेल प्रोजेक्ट रिपोर्ट)सम्म तयार नगरिएको उक्त पञ्चेश्वर योजना फेरि ब्युँताउनुको पछाडि ठूलो राष्ट्रघात छिपेको स्पष्ट छ ।
यता माधव नेपालको कठपुतली सरकारलाई महाकाली सन्धिको ढडियामा फसाउन भारतीय धुर्त शासक तयार छन् । यसरी भारतीय शासकहरूको योजनामा गरिएको माधव नेपालको भारत भ्रमणबाट सम्पूर्ण देशभक्त नेपाली सशंकित छन् । किनकि नेपालका राष्ट्रिय आत्मसमर्पणवादी शासकहरूका विगतका प्रत्येक भ्रमणबाट नेपाल र नेपाली जनताले धेरै कुरा गुमाउन बाध्य भएका छन् ।
फेरि पनि कठपुतली सरकार प्रमुख माधव नेपाल भारतीय योजनाका हरेक सन्धिसम्झौताहरूमा ल्याप्चे ठोक्न आतुर छन् । उनलाई राष्ट्र र जनताको भविष्यबारे कुनै चिन्ता छैन । उनले भारतीय प्रभुहरूको आशिर्वाद नभएको भए आफू प्रधानमन्त्रीको पदमा कहिल्यै पुग्न नसक्ने कुरालाई हरपल झल्झल्ती सम्झँदै अन्य विषयप्रति आँखा चिम्लिरहेका छन् ।
यो सरकारको प्रमुखलाई केवल सद्भावना भ्रमण गर्नेभन्दा अरु कुनै प्रकारको अधिकार नभएको कुरा प्रमुख प्रतिपक्ष दल एकीकृत माओवादीले उठाइरहँदा त्यसलाई बेवास्ता गर्दै कठपुतली सरकार ल्याप्चे ठोक्न हतारिन्छ भने उसले ठूलै मूल्य चुकाउनुपर्ने विज्ञहरू बताउँछन् ।
लावालस्करसहित हौसिदै भारत भ्रमणमा निस्केका असंवैधानिक प्रधानमन्त्री माधव नेपाल नेपाली जनताको आवाज र महत्त्वपूर्ण सुझावलाई आत्मसात गर्ने पक्षमा देखिंदैनन् ।
यता \'बाह्र वर्षमा खोलो ठेगानामा र्फकन्छ\' भन्ने नेपाली उखानलाई चरितार्थ पार्दै भारतीय शासकहरूले एमालेकै सरकारका पालामा थापेको महाकाली सन्धिको पासोमा अहिले फेरि एमाले नेतृत्वकै सरकारलाई फसाउन सफल हुने पक्कापक्की छ । भारतको चासोको विषय पानी हो । उसले कोशी, गण्डक र महाकाली हरेक सन्धिमा नेपालको अपार जलसम्पदा लुट्दै आएको छ । नेपालको तराई भाग सिंचाइ बिना सुखा क्षेत्रमा परिणत छ भने भारतले नदी सरहका नहर निर्माण गरी आफ्नो जमिनलाई हराभरा बनाएको नेपाली जनता टुलुटुलु हेर्न विवश छन् ।
यस्तो संवेदनशील विषयमा आफूलाई नेपाल र नेपाली जनताको प्रधानमन्त्री भन्न रुचाउने एमाले नेता माधव नेपाल गम्भीर देखिंदैनन् । हुन त उनी जनताद्वारा तिरस्कृत, बहिष्कृत र पराजित हुनका नाताले राष्ट्र र जनताप्रति रत्तिभर संवेदनशील छैनन् । अतः उनी भारतीय प्रभुहरूको मकसद पूरा गर्न ज्यान फालेर लागेका छन् ।
त्यसो त माधव नेपालजी हतियार खरिद गर्न पनि त्यत्तिकै आतुर छन् । उनले यसअघि नै रक्षामन्त्री विद्या भण्डारीमार्फत् हतियार खरिद गर्ने बन्दोबस्तसमेत मिलाइसकेका छन् । त्यसैगरी परराष्ट्रमन्त्री सुजाता कोइरालामार्फत् उनले भारतले सीमा अतिक्रमण नगरेको पुष्टि गराउने धृष्टतासमेत गरी दुनियाँका आँखामा छारो हालिसकेका छन् ।
यसबाट एमाले नेता एवं कठपुतली प्रधानमन्त्री माधव नेपाल, नेपालको शान्ति, समृद्धि, राष्ट्रियता र सार्वभौमिकताप्रति कति संवेदनहीन छन् भन्ने कुरा, पुष्टि गर्दछ । उनका यी तमाम क्रियाकलाप शान्तिविरोधी छन् भन्ने कुरा घामको उज्यालोसरह छर्लङ छ ।
फेरि पनि करोडौंको राजस्व खर्चेर गरिने यो भ्रमणबाट राष्ट्रघात र शान्तिप्रक्रिया भङ्ग गर्ने परिणाम नल्याओस् भन्ने नेपाली जनता चाहन्छन् । समयमै सरकारको चेत खुलेन भने जनआक्रोशको आँधीबेहरीले सबैखाले राष्ट्रघाती र जनविरोधी तत्वहरूलाई बढार्नेछ ।

patrika bata savar gareko